VOV4.Êđê- Hruê mbruê 18/8, ti anôk bruă knŭk kna, Khua knŭk kna Phạm Minh Chính tŭ drông leh k’iăng Khua knŭk kna, khua phŭn bruă hŏng tač êngao Kazakhstan Mukhtar Tileuberdi ƀri wưng hriê čuă ala čar Việt Nam mơ̆ng hruê 17 – 18/8. Khua knŭk kna Phạm Minh Chính mñă klă, Việt Nam yap yuôm bhăn klei bi hgŭm knhuah gru leh anăn bi mguôp lu mta bruă hŏng Kazakhstan.

Čiăng mtrŭt mđĭ ktang hĭn klei bi mguôp plah wah 2 ala čar hlăm hruê mmông kơ anăp, Khua knŭk kna Phạm Minh Chính mñă kơ 2 tĭng lŏ bi lar bruă klam mơ̆ng dhar bruă bi mguôp knŭk kna Việt Nam – Kazakhstan kơ klei bi mguôp bruă duh mkra – mnia mblei leh anăn klei kreh knhâo – mrâo mrang, blŭ hrăm bi klă klei kuôl kă hră mơar klei dưi êbat hiu kơ mnuih ƀuôn sang 2 ala čar, ăt msĕ hŏng hnưm mkŏ mjing êlan êdeh treng leh anăn êlan phiơr kpă plah wah Việt Nam – Kazakhstan. 2 tĭng ăt bi trông kơ dŭm boh klei hlăm alŭ wăl leh anăn tar rŏng lăn 2 tĭng dôk mđing, hlăm anăn mâo boh klei krĭng ksĭ Ngŏ.

Pô mblang: Y-Khem Niê