VOV4.Êđê- Tlam mbruê 13/7, ti adŭ bruă knŭk kna, Khua knŭk kna Phạm Minh Chính tŭ drông leh aduôn Pauline Tamesis, pô bi ala mơ̆ng Êpul hgŭm lu ala čar ti Việt Nam nao ba hră hưn mdah tiŏ nao ngă bruă mơ̆ng khua gĭt gai Êpul hgŭm lu ala čar, kčưm ngă bruă ti Việt Nam. Hlăm mmông tŭ drông, Khua knŭk kna brei thâo: Việt Nam mâo leh lu klei gĭr ktưn leh anăn klei đru mguôp hlăm dŭm mta bruă hlăm Êpul hgŭm lu ala čar, hlăm anăn rơ̆ng đua klam tŭ jing khua kiă kriê djŏ tuôr mơ̆ng Êpul gơ̆ng răng mgang klei êđăp ênang mơ̆ng Êpul hgŭm lu ala čar, mđĭ hĭn klei bi mguôp nao hgŭm hlăm bruă răng mgang klei êđăp ênang mơ̆ng Êpul hgŭm lu ala čar. Khua knŭk kna hmăng hmưi Êpul hgŭm lu ala čar srăng lŏ hrăm mbĭt leh anăn đru kơ Việt Nam hlăm hruê mmông kơ anăp, boh nik hlăm dŭm mta kñăm mđĭ kyar kjăp, krŭ wĭt wưng êdei klei ruă tưp, rơ̆ng klei hơĭt yang ƀuôn, đru hluê ngă dŭm klei ƀuăn rơ̆ng kơ klei mlih yan adiê. Khua knŭk kna mñă klă Việt Nam srăng lŏ dơ̆ng mtrŭt mđĭ dŭm bruă bi mguôp hŏng Êpul hgŭm lu ala čar leh anăn mkŏ mjing klei găl hĭn kơ dŭm êpul bruă Êpul hgŭm lu ala čar hluê ngă mâo boh tŭ dưn dŭm hdră êlan, hdră bi mguôp ti Việt Nam.

Pô mblang: Y-Ƀel Êban