Hlăm mmông tŭ drông, Khua knŭk kna Phạm Minh Chính bi mni kơ gưl hriê čuă Việt Nam mơ̆ng Khua phŭn bruă hŏng tač êngao Alexander Schallenberg, yap yuôm bhăn boh tŭ klei blŭ hrăm hŏng Khua phŭn bruă hŏng tač êngao Bùi Thanh Sơn leh anăn klei kƀĭn bi mguôp Việt Nam – Austria hŏng klei nao hgŭm mơ̆ng lu knơ̆ng bruă 2 tĭng ti aguah mbruê 17/4, bi êdah klei đăo knang gưl hriê čuă srăng ba klei mjĕ giăm leh anăn bi mguôp Việt Nam – Austria ƀrư̆ hruê ƀrư̆ đĭ kyar leh anăn tŭ dưn hlăm djăp mta bruă.

Khua knŭk kna Phạm Minh Chính mñă klă, Việt Nam dlăng yuôm bhăn leh anăn hmăng hmưi mđĭ hĭn klei bi mguôp hŏng Austria, sa ala čar yuôm bhăn hlăm Êpul hgŭm Ơrôp (EU). Khua knŭk kna mñă ktang, 2 tĭng čiăng hluê ngă đa đa hdră êlan mtrŭt mđĭ klei bi mguôp hlăm dŭm mta bruă mâo klei găl leh anăn klei čiăng msĕ si klei kreh knhâo – mrâo mran, bruă mkŏ mkra, mnuih mă bruă, mtô mjuăt bi hriăm, bruă mlih mrô, bruă duh mkra dar, mlih mtah.