Khua lăn čar bi trông hdră êlan hlăm Klei bi kƀĭn Êpul gơ̆ng klei bi hgŭm hŏng tač êngao Mi
Thứ năm, 10:02, 16/11/2023
VOV TAYNGUYEN
VOV TAYNGUYEN
VOV4.Êđê- Hlăm hdră nao hlăm Hruê kăm gưl dlông Klei bi kƀĭn bi hgŭm bruă duh mkra Asi- Pacific (APEC) 2023 leh anăn bi mguôp ngă bruă dua nah ti Mi, aguah anei 16/11, hlue si mmông Việt Nam, ti ƀuôn prŏng San Francisco, Khua lăn čar Võ Văn Thưởng nao hlăm klei bi trông kơ hdră êlan hlăm Klei bi kƀĭn Êpul gơ̆ng hŏng tač êngao Mi.
Blŭ hrăm hlăm klei bi trông, Khua lăn čar Võ Văn Thưởng bi mni kơ Êpul gơ̆ng bruă hŏng tač êngao mơ̆ng Mi mâo dŭm bruă bi hgŭm hlăm lu thŭn êgao hŏng Việt Nam, đru mguôp jăk hlăm bruă mđĭ klei hdơ̆ng thâo săng plah wah dua djuê ana leh anăn mđĭ kyar klei bi hgŭm plah wah dua ala čar. Khua lăn čar čang hmăng lŏ dơ̆ng mâo klei nao ai, đru yuôm bhăn mơ̆ng dŭm ƀĭng hgŭm Mi hŏng hdră mđĭ kyar leh anăn ñŭ kma hŏng tač êngao mơ̆ng Việt Nam.
Kơ klei bi hgŭm Việt Nam- Mi, Khua lăn čar lŏ mñă klei mâo hlăm klei bi hgŭm dua nah truh kơ klei lŏ bi hgŭm hlăm thŭn 1995, boh nik leh mkŏ mjing klei bi hgŭm kluôm hlăm thŭn 2013, klei bi hgŭm dua ala čar đĭ kyar ktang, êlam, sĭt, tŭ dưn leh anăn hgao jih klei lu mnuih đăo tĭng.
Viết bình luận