Diñu bi ala brei kơ giăm 500 čô phung mâo k’hưm mâo hrŏng ruah leh hlăm dŭm čar, ƀuôn prŏng kluôm ala, nao ti anôk bi mni, mpŭ kơ dŭm bruă yap jing kdlưn hĭn hlăm mnuih mâo k’hưm mơ̆ng mnuih djuê ƀiă thŭn 2023. Ti anôk bi tuôm, lu mnuih mâo k’hưm hao mdah leh hŏng khua lăn čar, lehanăn bi kah mbha hdơ̆ng găp ya mta bruă pô ngă leh hlăm klei mđĭ kyar bruă duh mkra, lehanăn bruă hâo hưn, lehanăn đru ba mnuih ƀuôn sang pô, mkŏ mjing klei thâo bi mguôp jih jang djuê ana...

Mơak mâo bi tuôm hŏng phung mâo k’hưm, Khua lăn čar Võ Văn Thưởng lač, Đảng, Lăn čar mâo nanao klei mđing duh mĭn kơ klei hdĭp mnuih djuê ƀiă, hlăm anăn mâo hdră lăn čar kñăm mđĭ kyar klei hdĭp mda mnuih djuê ƀiă. Khua lăn čar čang hmăng phung khua mduôn, khua ƀuôn lŏ dơ̆ng hâo hưn, mtrŭt mnuih djuê ƀiă bi kriê pioh, mđĭ bi lar knhuah gru jăk siam djuê ana pô, đru hlăm klei mđĭ kyar mbĭt jih jang knhuah gru dhar kreh Việt Nam.