VOV4.Êđê - Ƀri bi hdơr 47 thŭn Hrue dưi prŏng klei bi blah yan mnga (30/4), Khua lăn čar Nguyễn Xuân Phúc bi tuôm leh hŏng êpul hđeh hriăm hră kwar Dhŭng dôk ti lăn Dưr mkŏ mjing leh ti sang bi kƀĭn Thống Nhất, hlăm ƀuôn prŏng Hồ Chí Minh. Lŏ čuê leh knhuah gru kdrăm k’ah mơ̆ng dŭm gưl phung hđeh hriăm hră kwar Dhŭng nao êlâo, hđeh hriăm hră kwar Dhŭng gưl êdei amâo mâo mdei bi ktưn, mjuăt hriăm, mâo klei Đảng đăo knang, lehanăn phung ƀuôn sang mpŭ. Dŭm pluh čô jing leh Khua kiă kriê knơ̆ng hlăm êpul kiă kriê bruă Đảng gưl dlông, păn ngă lu bruă prŏng dŭm phŭn dhar bruă ti gưl dlông. Boh nik, hlăm ênuk mlih mrâo kluôm dhuôm lăn čar, lu “Asăr mjeh hrah” bi klă leh anăn pô hlăm bruă mđĭ kyar klei duh mkra, bi mdrŏng kơ lăn čar. Khua lăn čar lŏ mñă, dŭm gưl hđeh hriăm hră kwar Dhŭng khădah hŏng ya mta bruă klam, ti anôk dôk brei mâo nanao ai tiê hŏng Đảng, hŏng lăn čar, djă pioh klei khăp mơ̆ng Đảng, mơ̆ng Awa Hồ, lehanăn djă pioh hlăm ai tiê pô klei khăp, klei săn asei mlei, klei thâo bi kah êsei brei djam mơ̆ng phung ƀuôn sang kwar Dưr./.

Y-Khem pô mblang