VOV4.Êđê- Ƀri hruê Dhar kreh dŭm djuê ana Việt Nam (19/4), aguah hruê 19/4, ti Adŭ bruă Khua lăn čar, Khua lăn čar Nguyễn Xuân Phúc bi tuôm leh hŏng Êpul bi ala mâo 92 čô khua mduôn, khua ƀuôn, phung mbruă mnuih djuê ƀiă êdah êdi mâo lu klei đru mguôp hlăm bruă kriê pioh, mđĭ lar knhuah gru dhar kreh dŭm djuê ana. Blŭ hrăm ti knăm anei, Khua lăn čar Nguyễn Xuân Phúc mñă klă hdră mđing dlăng kriê, mkra mđĭ klei hdĭp mnơ̆ng dhơ̆ng lehanăn ai tiê klei mĭn kơ mnuih ƀuôn sang dŭm djuê ana ƀiă ƀrư̆ hruê dưi mđing dlăng, boh nik dŭm hdră bruă, hdră mtrŭn kriê pioh lehanăn mđĭ lar boh tŭ yuôm knhuah dhar kreh mơ̆ng dŭm djuê ana ayŏng adei, dlăng dhar kreh dŭm djuê ana jing sa kdrêč amâo dưi bi ktlah mơ̆ng bruă dhar kreh Việt Nam.

Khua lăn čar čang hmăng phung khua mduôn, khua ƀuôn, phung mbruă, mnuih mâo k’hưm lŏ dơ̆ng ba akŏ, jing gru mngač kơ anak čô lehanăn êpul êya; hur har dŭm hdră bruă ti alŭ wăl, lŏ dơ̆ng mtrŭt mjhar mnuih ƀuôn sang mđĭ lar knhuah gru dhar kreh jăk siam, čŏng pô gĭr ktưn, bi hgŭm mguôp djuê ana. Kyua hluê si Khua lăn čar, mơ̆ng klei bi hgŭm hlăm bruă dhar kreh, srăng mâo klei jĕ giăm, thâo săng lehanăn khăp čiăng hdơ̆ng găp, đru ksŭl mbŭ ai ktang Việt Nam, boh tŭ yuôm Việt Nam hlăm hruê anei lehanăn êdei anăp./.

                        Pô mblang: H’Nêč Êñuôl