Hơêč hmưi kơ phung khua bi ala hriê mă bruă ti Việt Nam, Khua lăn čar mñă, hŏng klei thâo hlăm bruă, mâo ai tiê hŏng lăn čar, anak mnuih Việt Nam, mâo klei đru mơ̆ng dŭm dhar bruă djŏ tuôm Việt Nam, phung khua bi ala srăng ngă jăk bruă klam pô. Drông čhưn hŏng khua bi ala knŭk kna (UAE), khua lăn čar Võ Văn Thưởng lač, dua ala čar mâo leh hdră mđĭ klei bi mnia mblei prŏng hĭn truh 10 êklai USD. Dua nah lŏ mđĭ hĭn klei bi hgŭm.

Drông khua bi ala knŭk kna Sri Lanka Sajeewa Umanga Mendis, khua lăn čar Võ Văn Thưởng lač, Việt Nam luôn bi myuôm klei bi mguôp mâo leh mơ̆ng đưm hŏng Sri Lanka. Dua nah lŏ mđĭ hĭn klei duh bi liê, hgŭm bruă duh mkra mnia mblei, đru hlăm bruă bi hrŏ ƀun, mđĭ kyar anak mnuih, bruă sang hră mơar, bruă mdrao mgŭn, bruă dhar kreh.

Drông khua bi ala knŭk kna Chile, Khua lăn čar Võ Văn Thưởng hơ̆k mơak ƀuh klei bi mguôp Việt Nam – Chile dưi lŏ ksul mbŭ, dua ala čar lŏ mđĭ hĭn klei bi mguôp hlăm wưng kơ anăp./.