Êpul bi lông dŭm čar krĭng Lăn Dăp Kngư leh anăn Krĭng kwar krah mâo 10 čar: : Gia Lai, Kon Tum, Dak  Lak, Dak Nông, Lâm Đồng, Quảng Nam, Quảng Ngãi, Bình Định, Phú Yên, Khánh Hòa mâo ênhă êbeh 87.180 km2 leh anăn mâo 26,3% ênhă lăn car. Hlăm thŭn êgao, dŭm čar hlăm êpul hluê ngă jăk dŭm klei bi lông bi ktưn msĕ si: mtrŭt mđĭ klei đĭ kyar bruă rŭ mdơ̆ng hrăm mbĭt, mrâo mrang, ngă klei miêt mkriêm, gang mkhư̆ klei luč liê mang.

Hŏng klei bi lông “Kluôm ala hriăm mbĭt mkŏ mkra krĭng ƀuôn sang mrâo” wưng thŭn 2021 – 2025, krĭng ƀuôn sang ti alŭ wăl dŭm čar hlăm êpul ƀrư̆ ƀrư̆ mâo klei mlih, bruă mkŏ mkra dưi duh bi liê, mđĭ hnơ̆ng, klei hdĭp mnuih ƀuôn sang dưi bi hơĭt. Blŭ hrăm hlăm klei kƀĭn trông, Khua lăn čar jing êjai Võ Thị Ánh Xuân yap yuôm bhăn klei bi lông bi ktưn, pah mni mơ̆ng dŭm čar hlăm êpul bi lông krĭng Lăn Dăp Kngư leh anăn krĭng kwar krah. Khua lăn čar jing êjai Võ Thị Ánh Xuân mñă kơ dŭm alŭ wăl lŏ dơ̆ng hluê ngă jăk bruă bi lông, pah mni srăng klă hŏng boh sĭt, nao hlăm klei hdĭp leh anăn jing boh kdrŭt kơ klei mđĭ kyar lăn čar.