VOV4.Êđê- Tlam 18/4, ti Anôk bruă Đảng gưl dlông, mkŏ mjing leh Klei bi kƀĭn tal dua mơ̆ng Anôk bruă gĭt gai Hdră bruă mkŏ mjing Knŭk kna mâo klei dưi ti gŭ klei gĭt gai mơ̆ng Khua hlăm phŭn bruă kđi čar, Khua lăn čar Nguyễn Xuân Phúc, Khua Anôk bruă gĭt gai hdră bruă. Blŭ hrăm ti anôk bi kƀĭn, Khua lăn čar Nguyễn Xuân Phúc brei thâo, phung hlăm êpul čih mkra, phung thơ̆ng kơ bruă, phung kreh knhâo mă leh bruă jăk, đua klam, bi trông êngiê, bi klin lu hră mơar yuôm bhăn mơ̆ng 27 akŏ, 3 hră čih klei bi kƀĭn trông ala čar; ba yua jih klei thâo hlăm bruă čih mkra čiăng dưi mâo hră čih Hdră bruă tal sa, hưn mdah hŏng Klei bi kƀĭn mơ̆ng Anôk bruă gĭt gai tal anei.

Khua lăn čar lač, mâo leh klei tŭ ư kơ klei thâo săng, klei čiăng êdi, hnơ̆ng yuôm bhăn leh anăn hdră  yuôm mơ̆ng Hdră bruă “mkŏ mjing leh anăn bi leh Knŭk kna mâo klei dưi yang ƀuôn ngă phŭn Việt Nam truh thŭn 2030, tă hdră truh thŭn 2045” kơ klei hlak mblang, boh sĭt leh anăn dŭm klei mĭn mlih mrâo đĭ kyar hơĭt kjăp mơ̆ng lăn čar ti gŭ klei gĭt gai mơ̆ng Đảng; mâo tur knơ̆ng hdră bhiăn leh anăn tur knơ̆ng kđi čar čiăng bi mklă dŭm bruă kčah hlăm hdră mkŏ mjing Hdră bruă./.

Pô mblang: H’Zawut Ƀuôn Yă