VOV4.Êđê- Hruê mbruê, Khua hlăm phŭn bruă kđi čar, Khua lăn čar Nguyễn Xuân Phúc gĭt gai leh klei kƀĭn tal 2 Êpul gơ̆ng bruă lĭng kahan leh anăn klei êđăp ênang wưng păn bruă thŭn 2021 -2026. Khua lăn čar pah mni dŭm êpul bruă lĭng kahan, kahan ksiêm, bruă hŏng tač êngao leh anăn dŭm phŭn, dhar bruă gưl dlông čŏng thâo klă boh sĭt, hlăk mblang, čih yap, đăo knăl boh sĭt klei bi blah plah wah Russia hŏng Ukraine, hmao đru kčĕ, đru mguôp, hưn mdah hŏng Khua gĭt gai Đảng, knŭk kna kơ dŭm klei mĭn, hdră êlan djŏ guôp. Êpul gơ̆ng mâo leh klei bi trông leh anăn brei klei blŭ kơ boh sĭt bruă ngăn prăk hlăm hruê mmông êgao leh anăn đăo knăl hlăm hruê mmông kơ anăp. Êpul gơ̆ng mñă kơ êpul kahan ksiêm leh anăn dŭm êpul êya djŏ tuôm hlăm hruê mmông kơ anăp lŏ dơ̆ng bi lar dŭm boh tŭ dưn mâo, ksiêm duah, đru kčĕ hŏng Đảng, knŭk kna dŭm hdră mtrŭn, hdră êlan ăt msĕ hŏng hluê ngă hrăm mbĭt, ktang phĭt, mâo boh tŭ dưn dŭm bruă klam, hdră êlan rơ̆ng klei êđăp ênang bruă ngăn prăk, đru krŭ wĭt bruă duh mkra ala ƀuôn kơ ala čar.

Pô mblang: Y-Ƀel Êban