VOV4.Êđê-Lŏ dơ̆ng hdră mă bruă hŏng dŭm phŭn, dhar bruă mă klei blŭ bi mguôp kơ hdră mkŏ mjing leh anăn bi kluôm ênŭm ala čar ngă phŭn Việt Nam truh ti thŭn 2030, tă hdră truh thŭn 2045, hruê mbruê 7/7, Khua lăn čar Nguyễn Xuân Phúc gĭt gai leh mmông mă bruă hŏng Bruă Đảng kahan ksiêm gưl dlông, êpul khua bruă Đảng phŭn bruă klei bhiăn. Hlăm mmông mă bruă, dŭm klei blŭ bi mguôp, bi trông mơ̆ng êpul gĭt gai ktrâo lač klă leh bruă mkŏ mjing hdră kluôm ênŭm, mâo hnơ̆ng tŭ jăk, mâo tur knơ̆ng leh anăn djŏ hŏng boh sĭt, mbĭt anăn lŏ đru mguôp klei blŭ kơ bruă mkŏ mjing leh anăn klei ngă bruă mơ̆ng Dhar bruă dhar ksiêm, dhar bruă klei bhiăn. Hlăm anăn, mâo lu klei blŭ bơ̆k bâo kơ klei mlih mrâo hlăm bruă mkŏ mjing leh anăn klei ngă bruă mơ̆ng dŭm anôk bruă ksiêm duah, anôk bruă ngă klei ƀuah mkra djŏ guôp hŏng klei găl mơ̆ng Việt Nam, rơ̆ng klei dưi êngiê anak mnuih hlăm bruă mkŏ mjing ala čar, ñŭ kma hŏng tar rŏng lăn. Blŭ hlăm mmông mă bruă, hŏng dŭm mta boh klei hlăm hdră mkăp djŏ tuôm hŏng dhar bruă kahan ksiêm, dhar bruă klei bhiăn leh anăn lu anôk bruă mkăn, Khua lăn čar mtă kơ êpul gĭt gai srăng lŏ mđing hmư̆ dŭm klei blŭ yuôm bhăn hlăm mmông mă bruă, mơ̆ng anăn bi mklin čiăng hưn mdah hŏng êpul gĭt gai ksiêm dlăng, hrŏng mă dŭm hdră êlan djŏ guôp.

Pô mblang: Y-Ƀel Êban