VOV4.Êđê- Hlăm klei nao ngă bruă ti dŭm čar krĭng Yŭ Dhŭng, aguah mbruê 7/4, Khua lăn čar Nguyễn Xuân Phúc mâo leh klei nao čuă, hơêč hmưi knăm Chôl Chnăm Thmây ti sang hră klei đăo yơng Nam tông Khmer, kdriêk čar Ô Môn, ƀuôn prŏng Cần Thơ. Sang hră anei dưi mkŏ mjing hlăk thŭn 2006 čiăng mtô mjuăt phung tăng sinh Khmer ti gưl hriăm cử nhân. Mơ̆ng hruê mkŏ mjing truh kơ ară anei, sang hră anei mkŏ mjing leh 5 gưl mtô mjuăt hŏng êbeh 200 čô tăng sinh, đru mđĭ klei thâo phung tăng sinh, phung đăo yơng ti dŭm sang yơng Khmer alŭ wăl krĭng Yŭ Dhŭng. Hlăm ai êwa mprăp drông knăm Chôl Chnăm Thmây, blŭ ti sang hră, Khua lăn čar Nguyễn Xuân Phúc mâo klei hơêč hmưi kơ phung khua kiă kriê klei đăo yơng, phung đăo yơng Nam tông Khmer, mbĭt anăn mâo klei êmuh čuă, hơêč hmưi thŭn mrâo kơ jih jang mnuih ƀuôn sang phung đăo yơng djuê ana Khmer drông knăm Chôl Chnăm Thmây thŭn 2022 bŏ hŏng klei suaih pral, êđăp ênang, hơ̆k mơak, trei mđao.

Pô mblang: Y-Ƀel Êban