VOV4.Êđê - Hrue mbrue (6/2), ti alŭ wăl knhuah gru hƀuê ênuk dhar kreh ala čar sang yang Hùng, ƀuôn prŏng Việt Trì – čar Phú Thọ, Khua lăn čar Nguyễn Xuân Phúc mtrŭt mjhar leh bruă tết pla kyâo Hdơr nanao kơ Awa Hô. Bruă anei mâo Phŭn bruă lŏ hma lehanăn Knơ̆ng bruă sang čư̆ êa čar Phú Thọ hgŭm mkŏ mjing. Blŭ hrăm hlăm knăm anei, Khua lăn čar iêo mthưr iêo mthưr kơ jih jang mnuih, grăp boh sang, djăp anôk bruă, êpul êya bi sa ai pla kyâo mtah, bi sĭt klei hlue ngă bruă pla mjing truh sa êklai phŭn kyâo mtah hlăm wưng thŭn 2021 – 2025, kyua sa Việt Nam mtah, đru rŭ mdơ̆ng lăn čar mtah mda lehanăn kjăp nanao. Khua lăn čar ăt mtă kơ čar Phú Thọ pla ƀiă êdi 2 êklăk phŭn kyâo mtah hlăm thŭn anei, msĕ hŏng hdră kčah leh. Hlăm thŭn 2020, khua knŭk kna mâo leh asăp mtrŭn mrô 45 ngă bruă anei. Thŭn 2021, Khua knŭk kna bi klă hdră mă bruă mrô 524 hŏng mta kñăm truh jih thŭn 2025, kluôm ala srăng pla ênŭm 1 êklai phŭn kyâo mtah./.

Y -Khem pô mblang