Hlăm mmông tŭ drông, Khua lăn čar jing êjai Võ Thị Ánh Xuân yap yuôm bhăn knơ̆ng prăk tar rŏng lăn mâo leh klei đru mguôp mđĭ kyar leh anăn mđĭ hnơ̆ng klei hdĭp mơ̆ng mnuih ƀuôn sang ti dŭm ala čar hgŭm dlông rŏng lăn. Bi hŏng Việt Nam, Knơ̆ng prăk tar rŏng lăn jing sa hlăm 3 ƀĭng hgŭm đĭ kyar, mkăp brei ngăn prăk lĭng čan mơ̆ng ala tač êngao lu hĭn, bi mâo djăp 35% prăk lĭng čan mơ̆ng ala tač êngao mơ̆ng Việt Nam.

Khua lăn čar jing êjai bi myuôm klei đru mơ̆ng aduôn Carolyn Turk leh anăn Knơ̆ng prăk tar rŏng lăn kơ Việt Nam, hlăm anăn mâo lu bruă yuôm bhăn msĕ si: bi kdung mmông tla nư, mâo lu klei kčĕ đru kơ Việt Nam gang mkhư̆ klei ruă tưp Covid-19, đru kơ Việt Nam hmar krŭ wĭt bruă duh mkra wưng êdei klei ruă tưp. Boh nik, Knơ̆ng prăk tar rŏng lăn ƀuăn iêo mkrum ai dưi hlăm brô 1 – 2 êklai dolar Mi sa thŭn đru kơ bruă duh bi liê mđĭ kyar mơ̆ng Việt Nam hlăm bruă hluê ngă dŭm hdră yuôm bhăn. Hlăm wưng kơ anăp, Khua lăn čar jing êjai mñă kơ knơ̆ng prăk tar rŏng lăn lŏ dơ̆ng bi mguôp kjăp, đru kơ Việt Nam hlăm klei mđĭ kyar lăn čar.