VOV4.Êđê - Mmăt hruê 28/4, ti čả Thừa Thiên Huế, Êpul hgŭm gru bi kal hrah gưl dlông Việt Nam bi hgŭm hŏng Knŏng bruă sang čư̆ êa čar mkŏ mjing knăm pŏk ngă Mlan đru kơ mnuih knap mñai thŭn 2022 hŏng akŏ” Bi mguôp êpul êya- lar bra bruă ngă klei khăp” leh anăn bi hdơr Hruê gru bi klak hrah leh anăn mlan wat mniă hrah dlông rŏng lăn (8/5). Khua lăn čar Nguyễn Xuân Phúc dự nao leh anăn blŭ hrăm hlăm klei bi kƀĭn. Mlan ngă bruă đru kơ mnuih knap mñai thŭn 2022 mphŭn mơ̆ng hruê 1/5 truh yhruê 31/5, jih jang Êpul hgŭm gĭr ktưn iêô mkrum mâo 400 êklai prăk čiăng đru kơ 1 êklăk gưl mnuih mâo klei hdĭp dleh dlan, hlăm anăn mâo 100 êbâo anôk đru kơ mnuih knap mñai. Boh nik, ti Knăm pŏk ngă Mlan đru kơ mnuih knap mñai thŭn 2022, Êpul hgŭm gru bi klak hrah Việt Nam mphŭn pŏk 2 hdră bruă phŭn pŏk ngă hlăm 5 thŭn kơ anăp, anăn jing Hdră: “êđăp ênang kơ phung trah mă kan hdang ƀun, dleh dlan” leh anăn “Mnơ̆ng tŭ jăk kơ phung hđeh ƀun, amâo jăk asei mlei”. Blŭ hrăm hlăm klei bi kƀĭn, Khua lăn čar Nguyễn Xuân Phúc iêô mthưr dŭm anôk bruă duh mkra, êpul bruă, phung mâo ai tiê kmah leh anăn mnuih ƀuôn sang đru, hrăm mbĭt hŏng Êpul hgŭm Gru bi klah hrah Việt Nam, mkŏ mjing sa êpul êya bi hgŭm, kyua êpul êya lar bra klei khăp.

H’Zawut pô mblang