VOV4.Êđê - Ƀri gưl bi hdơr 97 thŭn Hruê hră klei mrâo cách mạng Việt Nam, mmăt hruê 20-6, ti ƀuôn prŏng Hồ Chí Minh, Khua gĭt gai ƀuôn prŏng bi tuôm hŏng dŭm anôk bruă klei mrâo. Nao leh anăn blŭ hrăm hlăm klei bi tuôm, Khua lăn čar Nguyễn Xuân Phúc mơĭt kơ jih jang phung knuă druh, phung čih klei mrâo, phung mdar rup dŭm anôk bruă klei mrâo ti ƀuôn prŏng Hồ Chí Minh leh anăn jih jang phung ngă bruă klei mrâo kluôm ala klei khăp leh anăn klei hơêč hmưi jăk siam hĭn. Khua lăn čar Nguyễn Xuân Phúc mñă klă, mơ̆ng dŭm klei čih, klei mrâo dưi hưn brei răng hnưm čiăng kơ dŭm anôk bruă, mnuih amâo dưi leh anăn amâo jhŏng ngă soh, amâo jhŏng ƀơ̆ng ngăn. Boh nik hŏng bruă ktuê dlăng, bi tăng mgăl ala ƀuôn, klei mrâo dưi đru mkŏ mjing “Knŭk kna mơ̆ng mnuih ƀuôn sang, kyua mnuih ƀuôn sang leh anăn kyua mnuih ƀuôn sang.  Lŏ mñă wĭt kơ wưng ƀuôn prŏng Hồ Chí Minh leh anăn dŭm čar, ƀuôn prŏng nah Dhŭng tŭ lu klei luič liê kyua Covid-19, Khua lăn čar Nguyễn Xuân Phúc bi mni kơ êpul čih klei mrâo amâo uêñ kơ klei dleh dlan, jih hruê mlan hlăm anôk phŭn mdrơ̆ng hŏng klei ruă tưp, mơ̆ng anăn đru kơ mnuih ƀuôn sang kluôm ala thâo săng klei dleh dlan, thâo săng klei kjăp mơ̆ng bruă Đảng, bruă sang čư̆ êa dŭm alŭ wăl hgao klei ruă tưp, grăp knhuang kơrŭ wĭt dŭm bruă duh mkra, ala ƀuôn./.

H’ Zawut pô mblang