VOV4.Êđê - Leh Êpul čưng boh êkei U23 Việt Nam mâo klei tŭ dưi 1 – 0 ti anăp êpul čưng boh U23 Thái Lan, krơ̆ng kjăp jing Êpul čưng boh êkei mâo klei pah mni kdlưn hĭn ti Klei bi lông mjuăt ktang asei mlei Ngŏ Dhŭng Asi (SEA Games 31), Khua lăn čar Nguyễn Xuân Phúc, Khua knŭk kna Phạm Minh Chính, Khua bruă kƀĭn ala Vương Đình Huệ lehanăn Khua hlăm Phŭn bruă kđi čar, Khua anôk bruă Đảng Võ Văn Thưởng nao leh ti tač čưng boh h’êč hmưi lehanăn mđup brei mêđai êa Kông kơ êpul čưng boh êkei lehanăn êpul mjuăt bi hriăm U23 Indonesia; mđup brei mêđai êa Prăk kơ êpul mjuăt bi hriăm lehanăn êpul čưng boh êkei U23 Thái Lan; lehanăn mđup brei mêđai êa Mah kơ pô mjuăt bi hriăm Park-Hang-seo lehanăn êpul mjuăt bi hriăm lehanăn êpul čưng boh êkei jing “Kahan mtŭ kñĭ”, bi lông leh jih ai tiê pô ba wĭt klei hing ang kơ ala čar lehanăn ba leh klei m’ak kơ mnuih khăp čưng boh kluôm ala.

Bi ala Đảng, knŭk kna lehanăn mnuih khăp čưng boh kluôm ala, Khua lăn čar Nguyễn Xuân Phúc bi mni lehanăn lač jăk kơ pô mjuăt bi hriăm Park Hang-seo lehanăn êpul čưng boh U23 Việt Nam mjing leh hƀuê ênuk ti SEA Games 31. Khua knŭk kna Phạm Minh Chính mâo leh hră h’êč hmưi ko Êpul mjuăt bi hriăm lehanăn Êpul čưng boh êkei U23 Việt Nam leh mâo mă Medai êa Mah ti SEA Games 31. Boh tŭ dưn anei, mbĭt hŏng Medai êa mah mơ̆ng Êpul čưng boh mniê lehanăn dŭm klei bi lông ti SEA Games 31 dưi bi mklă leh k’hưm mơ̆ng klei čưng boh Việt Nam, hdră mjuăt ktang asei mlei Việt Nam ti krĭng wăl lehanăn ƀrư̆ ƀrư̆ kpưn đĭ kbưi hĭn./.

H’ Nêč pô mblang