VOV4.Êđê- Aguah mbruê 10/6, ti čar Quảng Nam, Khua lăn čar Nguyễn Xuân Phúc gĭt gai klei kƀĭn trông mguôp klei blŭ kơ “hdră mkŏ mjing leh anăn bi kluôm ala čar yang ƀuôn ngă phŭn Việt Nam truh ti thŭn 2030, tă hdră truh thŭn 2045” mă klei blŭ mơ̆ng êpul khua bruă Đảng čar, ƀuôn prŏng alŭ wăk krĭng kwar krah – krĭng Lăn Dăp Kngư. Anei jing klei kƀĭn trông tal 2 leh klei kƀĭn tal 1 ti Quảng Ninh mrâo êgao ƀiă hruê. Blŭ hlăm klei kƀĭn, Khua lăn čar Nguyễn Xuân Phúc čih yap, dŭm êpul bruă Đảng čar, ƀuôn prŏng bi êdah leh lu klei blŭ yuôm bhăn, mâo bruă klam, klă mngač kơ lu mta phŭn yuôm bhăn hlăm hdră mkăp. Mta phŭn dưi kluôm ênŭm leh dŭm boh klei kñăm hlăm hdră mkŏ mjing leh anăn bi kluôm ala čar yang ƀuôn ngă phŭn Việt Nam. Dŭm mta bruă kdlưn hĭn hlăm hdră mkăp dưi bi klă djŏ hŏng mta kñăm, dŭm bruă klam, hdră êlan dưi ba mdah klă mngač, găl guôp hŏng boh sĭt. Khua lăn čar lač, dŭm klei blŭ bi êdah ai tiê cách mạng, klei hmăng hmưi đru mguôp hlăm klei mlih mrâo leh anăn mđĭ kyar ala čar. Anei ăt jing boh kdrŭt čiăng kơ phung khua gĭt gai Đảng, knŭk kna gĭt gai, ktrâo lač hluê ngă tŭ jing bruă klam mkŏ mjing leh anăn bi kluôm ala čar yang ƀuôn ngă phŭn Việt Nam mơ̆ng mnuih ƀuôn sang, kơ mnuih ƀuôn sang, kyua mnuih ƀuôn sang.

Pô mblang: Y-Ƀel Êban