Tŭ ư asăp jăk iêô mơ̆ng Khua lăn čar Lương Cường, Khua mil čhil Bulgaria Rumen Radev leh anăn mô̆ ñu truh leh ti ƀuôn prŏng phŭn Hà Nội, mphŭn gưl nao čhưn klă sĭt ti Việt Nam mơ̆ng hruê 24- 28/11/2024. Aguah (25/11), ti Anôk bruă khua lăn čar, Khua lăn čar Lương Cường leh anăn mô̆ ñu gĭt gai leh Knăm drông Khua mil čhil Rumen Radev leh anăn mô̆ gơ̆ hriê čhưn ti Việt Nam.

 Leh knăm drông, Khua lăn čar Lương Cường leh anăn Khua mil čhil Rumen Radev ngă Khua êpul gưl dlông dua ala čar mâo klei bi trông, ksiêm dlăng boh tŭ bi hgŭm plah wah dua ala čar hlăm wưng êgao leh anăn kčĕ hdră bi hgŭm đĭ kyar hlăm wưng kơ anăp. Dua khua gĭt gai bi trông êlam kơ dŭm hdră tă prŏng, hdră msir klă klơ̆ng čiăng mđĭ klei bi hgŭm hlăm wưng kơ anăp. Boh nik mđĭ bi tuôm gưl dlông, bruă mnia blei, bi liê, mtrŭt mjhar dŭm Phŭn, dhar bruă alŭ wăl leh anăn anôk bruă duh mkra dua tĭng pŏk ngă tŭ dưn Klei kuôl kă mnia blei êngiê Việt Nam - EU; mđĭ ktang klei bi hgŭm hlăm bruă lŏ hma, dhar kreh mjuăt asei mlei, kdrăp hâo hưn, mkra mjing mnơ̆ng hlăm gŭ lăn, wăl hdĭp mda. Dua tĭng bi mklă srăng bi hgŭm kjăp, kah mbha klei thâo leh anăn bi nao ai hlăm klei bi kƀĭn lu tĭng, đru hrăm mbĭt msir mgaih klei lông dlăng kluôm rŏng lăn.