Ênhă pla mkai thŭn 2024 ti kdriêk Čư̆ Prông hlăm brô 300 ha ti dŭm să Ia Piơr, Ia Lâu leh anăn Ia Mơr, lu jing ƀĭng lŏ hma dŭm čar Bình Định, Phú Yên, Quảng Ngãi hriê mưn lăn pla mjing. Truh ară anei, dŭm gŏ êsei ƀĭng lŏ hma hrui êmiêt leh hlăm brô 150 ha, lu ênhă adôk pla hnui hĭn čiăng čhĭ hlăm gưl Tết.

Kyua yan adiê amâo găl jăk, mâo lu adiê hjan ngă kơ lu đang mkai brŭ, luč jih yan boh mnga. Ară anei, ênoh mkai trŭn ƀiă snăk ngă kơ lu ƀĭng lŏ hma lĕ hlăm klei dleh dlan. Lu ƀĭng lŏ hma, leh bi liê dŭm êtuh êklăk prăk ară anei luč hơăi mang leh anăn lŏ dơ̆ng klam nư ktrŏ snăk. Mâo đa đa lui đang mkai, đa đa lŏ gĭr hrui êmiêt čiăng tla prăk mưn lăn.