Leh hmư̆ klei blŭ, klei akâo phung bi ala blŭ hrăm hlăm Klei bi kƀĭn, Khua lăn čar Lương Cường brei thâo, Klei bi kƀĭn tal 10, Bruă kƀĭn ala gưl XV ti anăp jing klei bi kƀĭn knhal tuč wưng, jing klei yuôm bhăn, ksiêm wĭt bruă ngă jih wưng păn bruă, tă hdră kơ wưng đĭ kyar mrâo; hlăm anăn Bruă kƀĭn ala srăng ksiêm dlăng, bi mklă lu bruă yuôm bhăn, hlăm anăn mâo hlăm brô 50 hră čih hdră bhiăn, hdră mtrŭn leh anăn 13 êpul boh phŭn prŏng kơ bruă duh mkra -ala ƀuôn, hŏng lu bruă yuôm bhăn mkăn.

Mñă klă kơ grăp klei tŭ jing mơ̆ng lăn čar, mơ̆ng ƀuôn prŏng mâo sơăi klei đru mguôp yuôm bhăn mơ̆ng mnuih ƀuôn sang, Khua lăn čar čang hmăng mnuih ƀuôn sang lŏ dơ̆ng mđĭ lar knhuah gru krŭ kdơ̆ng kjăp, bi hgŭm, hrăm mbĭt sa ai tiê hŏng lăn čar, hrăm mbĭt mkŏ mjing ƀuôn prŏng Hồ Chí Minh jăk siam, mrâo mrang, klei khăp; mkŏ mjing lăn čar ƀrư̆ mdrŏng sah, kjăp ktang, bi knar hŏng ala čar mkăn msĕ si klei Awa Hồ čang hmăng.