Gưl hiu čhưn anei mơ̆ng Mtao Brunei mñă klă klei gĭr mơ̆ng dua ala čar amâo mdei dưi bi kjăp, bi êlam hĭn klei bi mjĕ hgŭm bruă hlăm djăp mta ra klei, leh dưi mkra mđĭ mơ̆ng Klei bi mjĕ dua nah jing Ƀĭng hgŭm kluôm dhuôm. Mbĭt anăn, gưl hiu čhưn bi êdah klei mpŭ lehanăn klei bi mjĕ jăk siam mơ̆ng Brunei hŏng Việt Nam, msĕ si sa ƀĭng hgŭm đăo knang hlăm ASEAN.

Hlăk klei bi mjĕ Ƀĭng hgŭm kluôm dhuôm Việt Nam-Brunei đĭ kyar jăk siam, gưl hiu čhưn truh ti Việt Nam mơ̆ng Mtao Brunei hlăk dưi bi kjăp lehanăn bi êlam hĭn klei đăo knang hlăm bruă kđi čar, mtrŭt mđĭ hdră bi hgŭm hlăm lu mta bruă mơ̆ng dua ala čar, hlăm anăn mâo hdră kđi čar – hŏng tač êngao, hdră lĭng kahan – răng mgang klei êđăp ênang, bruă duh mkra, mnia mblei, duah bi liê, mjuăt bi hriăm, kreh dhar,Halal, mjĕ mjuk mnuih ƀuôn sang… Leh knăm drông, Khua lăn čar Lương Cường lehanăn Mtao Brunei djă akŏ Êpul bi ala gưl dlông dua ala čar hluê ngă leh hdră bi trông, tĭng dlăng boh tŭ hdră bi hgŭm plah wah dua ala čar hlăm wưng êgao lehanăn ba mdah dŭm hdră êlan bi hgŭm bruă hlăm wưng ti anăp./.