Blŭ hrăm hlăm hlăm klei bi hdơr, Khua lăn čar Lương Cường bi mklă, hlăm jih êlan 80 thŭn mkŏ mjing, mđĭ kyar leh anăn hriê kơ prŏng, ti gŭ klei gĭt gai mơ̆ng Đảng, êpul phung mgang kđi Việt Nam hrăm mbĭt hŏng djuê ana leh anăn mâo klei đru mguôp prŏng prĭn hlăm klei bi blah bi kdơ̆ng hŏng phung Prăng, Mi, mtlaih êngiê djuê ana, hluh lir lăn čar, ăt msĕ mơh bruă mkŏ mjing leh anăn răng mgang čar kwar hruê anei.

Khua lăn čar Lương Cường đăo knang, hŏng ai tiê bi hgŭm, mbruă leh anăn đua klam, êpul mgang kđi Việt Nam srăng lŏ dơ̆ng mđĭ lar knhuah gru kdrưh kơăm 80 thŭn êgao; amâo mdei gĭr ktưn tui hriăm, mđĭ knhuah kđi čar, bruă knuă, klei thâo mă bruă, knhuah mă bruă čiăng hlue ngă bruă klam kdrưh kơăm: Răng mgang klei kpă, kriê pioh klei bhiăn, răng mgang klei dưi anak mnuih, klei dưi leh anăn klei tŭ dưn djŏ hdră bhiăn mơ̆ng mnuih ƀuôn sang, knŭk kna leh anăn ala ƀuôn, đru klă sĭt hlăm bruă mkŏ mjing, mđĭ kyar lăn čar hlăm ênuk mrâo.