VOV4.Êđê- Aguah mbruê 12/9, ti sang bruă Khua lăn čar, Khua lăn čar Nguyễn Xuân Phúc jao leh klei bi klă mđĭ grat mơ̆ng Trung tướng jing Thượng tướng hŏng Phùng Sĩ Tấn, k’iăng khua đru kčĕ bruă lĭng kahan yang ƀuôn Việt Nam. Khua lăn čar đăo knang leh anăn hmăng hmưi Thượng tướng Phùng Sĩ Tấn lŏ dơ̆ng rơ̆ng kjăp bruă klam leh anăn klei mĭn bruă kđĭ čar, siă suôr hŏng mta kñăm, klei mĭn bruă cách mạng mơ̆ng Đảng, mđĭ klei thâo săng, bruă klam hlăm klei tui hriăm, mđĭ knhuah bruă cách mạng mơ̆ng sa čô knuă druh, đảng viên, mơ̆ng knuă druh gưl tướng, djŏ hŏng anăn “lĭng kahan Awa Hồ”.

Khua lăn čar mtă kơ Thượng tướng Phùng Sĩ Tấn thâo klă nanao boh sĭt, hrăm mbĭt hŏng phung khua kiă kriê phŭn bruă đru kčĕ mkŏ mjing anôk bruă kjăp ktang, knar hŏng bruă klam hlăm wưng mrâo, bi lar knhuah gru hing ang, klei siă suôr, klei thâo mĭn, thâo mbruă, bi mguôp, gĭr bi mâo klei dưi”.

Pô mblang: Y-Ƀel Êban