Khua lăn čar Võ Văn Thưởng nao hgŭm leh anăn mđup brei klei pah mni yuôm bhăn mơ̆ng Đảng, knŭk kna kơ dŭm êpul êya leh anăn grăp čô hlăm knăm anei. Blŭ hrăm hlăm knăm mđup brei, Khua lăn čar Võ Văn Thưởng hơêč hmưi leh anăn pah mni êpul hưn hgăm bruă lĭng kahan hlăm giăm 78 thŭn mkŏ mjing, bi blah leh anăn đĭ hriê kơ prŏng, đru mguôp yuôm bhăn hlăm bruă bi êngiê djuê ana, hluh hlir ala čar êlâo dih, ăt msĕ hŏng hŏng mkŏ mjing leh anăn răng mgang ala čar ênuk ară anei.

Hlăm wưng kơ anăp, Khua lăn čar mtă kơ êpul hưn hgăm bruă lĭng kahan, hlăm djăp boh klei ăt srăng hluê ngă djŏ hră bhiăn mơ̆ng Đảng gĭt gai, klă anăp hlăm djăp mta bruă. Bruă hưn hgŭm lĭng kahan čiăng lŏ dơ̆ng hluê ngă jăk bruă klam jing anôk bruă hưn hgăm hdră êlan mơ̆ng Đảng, knŭk kna leh anăn anôk bruă hưn hgăm thơ̆ng kơ bruă lĭng kahan mơ̆ng Knơ̆ng gĭt gai lĭng kahan gưl dlông, Phŭn bruă lĭng kahan, đru mguôp klă sĭt, tŭ dưn kơ klei gĭt gai mơ̆ng Đảng, knŭk kna, Knơ̆ng gĭt gai lĭng kahan gưl dlông, Phŭn bruă lĭng kahan bi klă boh sĭt, hdră êlan leh anăn mgaih msir dŭm boh klei, amâo mâo brei mâo klei kdjăt kƀla…Năng jing ală, knga mơ̆ng Đảng, knŭk kna leh anăn Lĭng kahan.