Khua lăn čar Võ Văn Thưởng mrâo mâo leh lu bruă ngă yuôm bhăn; Ti knăm mtao đĭ păn bruă, mâo bi tuôm hŏng Mtao Charles III, bi tuôm hŏng khua knŭk kna Angle Rishi Sunak; bi tuôm hŏng khua bruă kƀĭn ala nah gŭ Angle Lindsay Hoyle, K’iăng khua bruă kƀĭn ala nah gŭ Nigel Evans, Khua phŭn bruăhŏng tač êngao James Cleverly, Khua phŭn bruă lĭng kahan Ben Wallace lehanăn lu phung khua prŏng hlăm knŭk kna ala čar Angle.

Hlăm klei bi tuôm, Khua lăn čar Võ Văn Thưởng lehanăn mtao Charles III, khua kiă kriê knŭk kna, khua bruă kƀĭn ala bi êdah sơăi klei jăk găl prŏng bi hgŭm hŏng Việt Nam, dua nah bi êdah hdră êlan mrâo kñăm mđĭ hĭn klei bi mguôp, boh nik klei bi tuôm phung khua kiă kriê gưl dlông hlăm knŭk kna, lehanăn klei bi mguôp mnuih ƀuôn sang. Dua nah ƀuăn bi hgŭm đru ti anôk bi kƀĭn lu tĭng msĕ si Angle – ASEAN, Êpul hgŭm lu ala čar, Êpul gơ̆ng klei dưi êngiê anak mnuih wưng thŭn 2023 - 2025 lehanăn klei bi kƀĭn ƀĭng hgŭm kluôm lehanăn hluh krĭng ksĭ Pacific./.