VOV4.Êđê- Aguah mbrue (11/8), ti Hà Nội, Khua lăn čar Nguyễn Xuân Phúc, khua êpul mkŏ mjing “Hdră êlan rŭ mdơ̆ng knŭk kna dôk ti gŭ klei bhiăn yang ƀuôn ngă phŭn Việt Nam truh thŭn 2030, tă êlan truh kơ thŭn 2045” kiă kriê klei bi kƀĭn hlăm mmông mă bruă hŏng êpul Khua kiă kriê Êpul Gơ̆ng bruă hlak mblang gưl dlông. Anei jing mmông mă bruă knhal tuič hŏng Êpul čih mkra čiăng bi leh bruă čih mkra lehanăn ba mdah hŏng Phŭn bruă kđi čar.

Khua lăn čar lač klă jih jang klei đru mguôp mơ̆ng dŭm anôk bruă, êpul êya lehanăn phung khua êmua hlăm êpul kiă kriê, mâo lu klei blŭ mơ̆ng Êpul Gơ̆ng bruă hlak mblang gưl dlông, leh lu blư̆ lŏ bi mlih, čih mkra truh kơ ară anei, hdră čih mkra hdră êlan mâo leh klei bi mlih yuôm bhăn klă mngač hĭn, mđĭ hnơ̆ng thâo kiă kriê kluôm hĭn. Khua lăn čar mñă, mkŏ mjing knŭk kna ti gŭ klei bhiăn yang ƀuôn ngă phŭn jing bruă čuăn kơ hƀuê ênuk, jing bruă klam prŏng kơ kluôm Đảng, jih jang phung ƀuôn sang, bi hrăm mbĭt hlue ngă ba wĭt klei tŭ dưn hlăm dŭm thŭn kơ anăp./.

Pô mblang: Y-Khem Niê