VOV4.Êđê- Lŏ dơ̆ng hlăm klei mă bruă ti čar An Giang, aguah mbrue (18/1), ti ƀuôn prŏng Long Xuyên, Khua lăn čar Nguyễn Xuân Phúc nao ti anôk bi kƀĭn duh bi liê bruă mkra êlan dơ̆ng prŏng mrô 91, lehanăn êlan dar ƀuôn prŏng Long Xuyên. Anei jing êlan dơ̆ng tal êlâo mơ̆ng Phŭn bruă êlan klông dŭn mdiăng rŭ mkra hlăm thŭn 2022. Bruă mkra êlan dơ̆ng mrô 91 lehanăn êlan dar ƀuôn prŏng Long Xuyên mâo leh Khua knŭk kna êlâo Nguyễn Xuân Phúc bi klă hdră duh bi liê mơ̆ng hlăk thŭn 2017, dôk hlăm ênoh bruă bi hluh êlan hlăm krĭng Dap Mnai krông Mekong. Êlan anei hŏng ênoh bi liê jih jang truh 2 êbâo 100 êklai prăk, mâo prăk mơ̆ng knơ̆ng prăk mđĭ kyar Asi ADB duh bi liê, lehanăn sa kdrêč prăk mơ̆ng knŭk kna, mâo Phŭn bruă êlan klông dŭ mdiăng jing pô duh bi liê. Anei jing êlan dôk hmăng hmưi mơ̆ng sui leh êbeh 20 thŭn êgâo mơ̆ng phung ƀuôn sang An Giang čiăng mkra mjing. Khua lăn čar Nguyễn Xuân Phúc hơ̆k mơak nao ti anôk mphŭn rŭ mkra êlan lehanăn čang hmăng anei srăng jing bruă prŏng tal êlâo thŭn 2022, mơ̆ng anăn srăng lŏ dưi pŏk mlar ngă klei duh bi liê hlăm jih êlan dơ̆ng ktue hang, lehanăn êlan êa ksĭ, êlan hlăm hnoh krông ti An Giang lehanăn alŭ wăl krĭng dap mnai krông Cửu Long, alŭ wăl mâo truh 20 êklăk čô mnuih hŏng lu klei găl kơ bruă mđĭ kyar./.

Êdei anăn hlăm tlam 18/1, Khua lăn čar Nguyễn Xuân Phúc nao hlăm knăm mphŭn ba yua sang braih Hạnh Phúc ti kdriêk Tri Tôn, čar An Giang. Anei jing sang mkra mjing dưi lač mâo hnơ̆ng prŏng hĭn ti Asi hŏng hnơ̆ng braih mâo 1000 ton hlăm sa hruê. Khua lăn čar Nguyễn Xuân Phúc mñă klă, hŏng sa bruă lŏ hma msĕ si ala čar drei, bruă mtrŭt mjhar tuh tia mkra mjing jing čiăng êdi čiăng mjing ênoh yuôm, đru mđĭ klei hdĭp mnuih ƀuôn sang. Hơêč hmưi kơ Knơ̆ng bruă Êpul grup Tân Long mphŭn ba yua sang mkra mjing braih Hạnh Phúc, Khua lăn čar mtă kơ Knơ̆ng bruă amâo djŏ knŏng mđing dlăng kơ klei bi ktưn mnơ̆ng dhơ̆ng ti anôk ba čhĭ kơ ala tač êngao ƀiădah brei bi mklă bruă kriê pioh mơ̆ng ala čar pô, bi hgŭm jăk hŏng mnuih ƀuôn sang, amâo dưi kpĭ ênoh mdiê mnuih ƀuôn sang.

Pô mblang: Y-Khem Niê