Blŭ hrăm tinei, Khua lăn čar bi klă, dŭm thŭn êgao, êpul kahan ksiêm yang ƀuôn, êpul răng mgang klei êđăp ênang dưi hyuă kjăp, hluê ngă djŏ klei gĭt gai, hdră tă mơ̆ng khua gĭt gai Đảng, knŭk kna hŏng bruă răng mgang klei êđăp ênang bruă kđi čar. Kluôm êpul êya dưi mghaih msir grăp klei dleh dlan, bi mguôp, sa ai, mâo klei thâo mĭn, klei mbruă, bi leh jih bruă klam kđi čar dưi jao, đru răng mgang klei êđăp ênang, hơĭt kjăp, mkŏ mjing klei găl mđĭ kyar bruă duh mkra ala ƀuôn mơ̆ng lăn čar, mđĭ kơhưm, rup ala čar Việt Nam hlăm tar rŏng lăn.

Tă hdră kơ đa đa bruă klam kñăm mơ̆ng êpul răng mgang klei êđăp ênang bruă kđi čar hlăm wưng kơ anăp, Khua lăn čar Võ Văn Thưởng mñă kơ Bruă Đảng kahan ksiêm gưl dlông, Bruă Đảng anôk bruă răng mgang klei êđăp ênang bruă kđi čar ngă jăk bruă đrui kčĕ hdră êlan hlăm bruă răng mgang tur knơ̆ng klei mĭn mơ̆ng Đảng, răng mgang klei gĭt gai, klei kiă kriê mơ̆ng Đảng, răng mgang mnuih ƀuôn sang, knăm thâo klă, đăo knăl djŏ boh sĭt mơ̆ng hnưm, mơ̆ng kbưi dŭm klei arưp aram hgăm, mnêč hgăm, klei ksŭng ngă kñăm hmao hưn mdah hŏng dŭm gưl bruă mâo hdră êlan ngă bruă tŭ dưn.