VOV4.Êđê - Lŏ dơ̆ng klei mă bruă ti dŭm čar krĭng Dhŭng, aguah mbruê 19/1, ti čar Tiền Giang, Khua lăn čar Nguyễn Xuân Phúc nao hgŭm leh hlăm knăm pŏk brei êrô êlan dơ̆ng pral Trung Lương-Mỹ Thuận, đru kơ bruă êrô êbat hlăm wưng Tết Nguyên đán Nhâm Dần 2022. Êlan dơ̆ng pral anei mâo bruă klam yuôm bhăn hlăm klei mnia mblei, bi mguôp dŭm alŭ wăl krĭng dap mnai Cửu Long hŏng ƀuôn prŏng Hồ Chí Minh leh anăn dŭm anôk bruă duh mkra krĭng Dhŭng. Blŭ hlăm knăm anăn, Khua lăn čar Nguyễn Xuân Phúc lač klă, bruă mkŏ mkra êlan klông jing boh nŭt yuôm bhăn hŏng krĭng dap mnai Cửu Long, leh anăn hdră ngă mâo klei êmưt hlăm lu thŭn ngă truh kơ klei amâo jăk hlăm mnuih ƀuôn sang. Kyuanăn knŭk kna mâo leh dŭm klei bi klă kñăm mgaih msir dŭm boh klei kơ ngăn prăk, klei ngă bruă, pô ngă bruă… Khua lăn čar Nguyễn Xuân Phúc ăt lŏ yap yuôm bhăn kyua êpul grŭp Đèo Cả ngă leh klei gĭt gai ktang phĭt, ngă bruă hruê mlam, mgaih msir dŭm boh klei mâo, wăt hlăm wưng klei ruă tưp, čiăng êdeh dưi găn êrô.

Y- Ƀel pô mblang