VOV4.Êđê- Aguah 23/9, ti ƀuôn prŏng Đà Nẵng, bruă Đảng ƀuôn prŏng Đà Nẵng bi hgŭm hŏng Anôk bruă hƀuê ênuk lĭng kahan, Anôk bruă lĭng kahan krĭng 5 mkŏ mjing klei bi trông kreh knhâo hŏng akŏ: “70 thŭn mblah dưi Đồn Nhất - Hải Vân Quan - Gru kruăk knăl hƀuê ênuk, klei thâo kơ bruă mkŏ mjing ai tiê mnuih ƀuôn sang. Hlăm hƀuê ênuk ala čar, klei mblah dưi Đồn Nhất - Hải Vân Quan ngă mâo lu klei thâo leh anăn klei hriăm yuôm bhăn kơ êpul lĭng kahan wăl krĭng 5 hlăm jih klei bi blah bi kdơ̆ng hŏng kahan Prăng leh anăn Mi.

Klei mblah anei jing gru hmô kơ klei bi blah mơ̆ng lĭng kahan leh anăn mnuih ƀuôn sang krĭng 5, pŏk sa hdră mblah mrâo hlăm klei dliê krmơ̆ng, čư̆ čhiăng dleh dlan, anôk dôk kđap phung roh kjăp hŏng kdrăp phao ktuang ktang, klei mblah dưi  Đồn Nhất bi mklă leh klei bi mguôp kjăp plah wah bruă lĭng kahan leh anăn bruă kđi čar, plah wah klei bi blah mơ̆ng lĭng kahan phŭn bi mguôp hŏng ai ktang mnuih ƀuôn sang leh anăn mđĭ kyar kahan ƀuôn alŭ wăl. Klei bi kƀĭn jing gưl lŏ dlăng wĭt klei hriăm yuôm bhăn hlăm dua klei bi blah sui thŭn mlan mơ̆ng djuê ana, mkăp thiăm klei kreh knhâo, bi mklă hĭn bruă klam mơ̆ng hdră yang ƀuôn răng mgang čar kwar./.

Pô mblang: H’Zawut Ƀuôn Yă