VOV4.Êđê -  Mlam mmăt mbrue (14/6), čar Quảng Bình mkŏ mjing leh knăm bi hdơr kơ awa lehanăn mdah klei kdŏ mmuiñ bi hdơr 65 thŭn Hrue awa Hô nao čuă čar Quảng Bình. Blŭ hrăm ti knăm anei, Khua lăn čar Nguyễn Xuân Phúc lač, Quảng Bình jing krĭng lăn yuôm bhăn, anôk bi klin lu knhuah gru dhar kreh prŏng mơ̆ng djuê ana. Mâo hŏng anei 65 thŭn, hrue 16/6/1957, Awa Hô nao čuă car Quảng Bình.

Hlăm 65 thŭn hlue ngă klei awa mtă, boh nik êbeh 35 thŭn mâo klei bi mlih mrâo, krĭng lăn anei tuôm jing leh anôk rai mơ̆ng boh phao ktuang ênuk bi blah, ară anei mâo leh klei bi mlih prŏng. Bruă Đảng, lĭng kahan lehanăn phung ƀuôn sang Quảng Bình mâo nanao klei bi mguôp sa ai tiê, gĭr nanao dưi mâo ba wĭt leh boh tŭ dưn jăk hlăm jih jang djăp mta bruă. Jih jang boh tŭ dưn leh mâo jing năng myưng m’ang snăk, mjing leh atur kjăp kơ Quảng Bình mđĭ kyar pral lehanăn kjăp hĭn hlăm wưng kơ anăp. Ti anôk bi hdơr, phung bi ala lehanăn jih jang phung ƀuôn sang nao dlăng klei kdŏ mmuiñ yuôm bhăn: “Ƀuăn hŏng Awa mâo klei thâo ktưn nanao”./.

Y-Khem pô mblang