VOV4.Êđê - Tlam 15/2, ƀri bi hdơr 233 thŭn mâo klei tŭ dưi Ngọc Hồi - Đống Đa (1789-2022), 92 thŭn hruê mkŏ mjing Đảng Cộng sản Việt Nam, čar Bình Định mkŏ mjing knăm mphŭn ba yua sang yang Tây Sơn Tam Kiệt, hdră yuôm bhăn kơ hƀuê ênuk, dhar kreh, kreh knhâo, mguôp hŏng anăn Mtao Quang Trung leh anăn hdră krŭ kdơ̆ng Tây sơn, ênuk Tây Sơn knhal jih êtuh thŭn XVIII. Nao hlăm knăm anei mâo Khua lăn čar Nguyễn Xuân Phúc hŏng mô̆ ñu, khua gĭt gai dŭm phŭn, dhar bruă gưl dlông, alŭ wăl leh anăn mnuih ƀuôn sang čar Bình Định.

Blŭ hrăm hlăm knăm anei, Khua lăn čar lač 5 klei hriăm mơ̆ng Quang Trung - Nguyễn Huệ, Mtao mâo klei thâo kiă kriê, thâo mbruă. Anei jing klei hriăm yuôm bhăn hŏng bruă răng mgang ala čar, răng mgang klei êđăp ênang ala čar leh anăn jing klei yuôm bhăn mđĭ kyar bruă duh mkra ala ƀuôn kơ Bình Định leh anăn kluôm ala. Khua lăn čar mtă kơ Bruă Đảng, bruă sang čư̆ êa leh anăn mnuih ƀuôn sang čar Bình Định hŏng Phŭn bruă dhar kreh, mjuăt ktang asei mlei leh anăn hiu čhưn ênguê, dŭm anôk bruă, êpul bruă djŏ tuôm pŏk ngă bi jăk leh anăn tŭ dưn bruă ala čar răng mgang leh anăn mđĭ lar ênoh yuôm Mnơ̆ng kriê pioh wăl Sang Yang Tây Sơn Tam Kiệt, hnưm mkŏ mjing hdră bruă răng mgang leh anăn mđĭ lar hơĭt kjăp ênoh yuôm ala čar yuôm bhăn anei.

H’Zawut pô mblang