VOV4.Êđê- Hlăm mlam mmăt hrue mbruê (6/4) hŏng ai êwa kluôm ala dôk bi hdơr kơ hrue mtao Hùng djiê 10/3 hlue mlan ƀlĕ, ƀuôn prŏng Cần Thơ mkŏ mjing leh knăm bi leh sang yang kơ mtao Hùng, sa anôk bruă dhar kreh bi êdah knhuah gru mnăm êa hdơr kơ akŏ mơ̆ng djuê ana, kñăm čih pioh ai tiê rŭ mdơ̆ng lăn čar mơ̆ng phung mtao Hùng. Phŭn tal êlâo hlăm knăm, ti anôk ngă yang phŭn hlăm sang yang, Khua lăn čar Nguyễn Xuân Phúc djă akŏ êpul phung kiă kriê, phung khua gĭt gai Đảng, knŭk kna êlâo dih nao čuh leh brui mngưi, bi hdơr kơ phung mtao Hùng. Khua lăn čar jing pô kiă kriê klei čuh brui mngưi ti knưl ngă yang tui si hdră dăp leh mơ̆ng Quốc tổ Hùng Vương; Tổ Phụ Lạc Long Quân, Tổ Mấu Âu Cơ, Lạc tướng, Lạc Hầu. Lehanăn čih dŭm klei bi hdơr hlăm hră čih pioh hlăm sang yang, Khua lăn čar Nguyễn Xuân Phúc bi êdah anei srăng jing anôk kkuh mpŭ kơ phung mtao Hùng hlăm krĭng lăn nah Dhŭng, bi mguôp hŏng jih jang sang yang kơ mtao Hùng ti krĭng Dưr, msĕ si sa klei mkŏ Dưr – Dhŭng jing sa boh sang, lăn ala êa djuh sa đrông, đĭ kyar mdrŏng sah, jhŏng ktang./.

Pô mblang: Y-Khem Niê