VOV4.Êđê- Ƀri wưng nao hlăm knăm ba yua sang kkuh kơ phung lĭng kahan djiê êngiê ti anôk bi blah Điện Biên Phủ leh anăn mă bruă ti čar Điện Biên hlăm 2 hruê 17 leh anăn 18/5. Khua lăn čar Nguyễn Xuân Phúc myơr brui mngưi, wang mnga bi hdơr kơ phung lĭng kahan jhŏng ktang djiê êngiă ti msat lĭng kahan djiê êngiă ala čar A1, nao čuă dlăng sang hƀuê ênuk klei dưi bi blah Điện Biên Phủ, nao čuă, mđup brei mnơ̆ng dhơ̆ng kơ phung lĭng kahan hđăp Điện Biên ti alŭ wăl čar.

Khua lăn čar Nguyễn Xuân Phúc leh anăn êpul ngă bruă hŏng klei mpŭ myơr brui mngưi bi hdơr kơ phung jhŏng ktang djiê êngiă ti msat lĭng kahan djiê êngiă ala čar A1. Lŏ dơ̆ng kơnăn, Khua lăn čar Nguyễn Xuân Phúc nao čuă dlăng sang rang mdah hƀuê ênuk klei dưi bi blah Điện Biên Phủ, jing anôk rang mdah, djă pioh dŭm hră mơar, mnơ̆ng dhơ̆ng hlăm klei bi blah Điện Biên Phủ. Čih hră bi hdơr ti sang rang mdah hƀuê ênuk, Khua lăn čar Nguyễn Xuân Phúc bi êdah klei mgei ai tiê êjai nao čuă anôk anei, jing anôk djă pioh mnơ̆ng dhơ̆ng, rup, ai tiê jhŏng ktang mơ̆ng phung lĭng kahan djiê êngiă, lĭng kahan Điện Biên hlăm klei bi blah Điện Biên Phủ 56 hruê mlam, mâo klei dưi “Hing ang 5 krĭng, mgei tar boh lăn”.

         Pô mblang: Y-Khem Niê