VOV4.Êđê- Ƀri bi hdơr 40 thŭn Hruê mkŏ mjing lehanăn mprăp Klei bi kƀĭn tal IX wưng thŭn 2022- 2027 mơ̆ng Knơ̆ng bruă Rŭ mdơ̆ng Việt Nam, tlam hruê 5/7, ti Adŭ bruă Khua lăn čar, Khua lăn čar Nguyễn Xuân Phúc bi tuôm leh hŏng êpul bi ala êbeh 7 êbâo čô hgŭm, êpul êya, mnuih hlăm Knơ̆ng bruăa rŭ mdơ̆ng Việt Nam. Blŭ ti knăm anei, bi ala khua kiă kriê Đảng, Knŭk kna, Khua lăn čar bi mni dŭm klei đru mguôp, klei gĭr mơ̆ng Knơ̆ng bruă Rŭ mdơ̆ng Việt Nam hlăm 40 thŭn êgao hŏng hdră mkŏ mkra lehanăn mđĭ kyar lăn čar.

Khua lăn čar mtă kơ Knơ̆ng bruă mđĭ lar knhuah gru 40 thŭn, jak iêu phung mă bruă kreh knhâo, phung thơ̆ng kơ bruă hlăm ala čar lehanăn phung thâo lu mnuih Việt Nam dôk ti ala tač êngao čiăng mđĭ hnơ̆ng tŭ hdră mă bruă. Mbĭt anăn mđĭ hnơ̆ng tŭ hdră đru kčĕ, ksiêm dlăng hlăm bruă rŭ mdơ̆ng; đru kčĕ kơ Đảng lehanăn Knŭk kna hlăm dŭm bruă mđĭ kyar djŏ tuôm kơ klei sang dôk, krĭng ƀuôn prŏng, wăl tuh tia mkra mjing, dŭm anôk bruă nah gŭ, hdră čuăl mkă rơ̆ng jiă knhuah dhar kreh djuê ana Việt Nam./.

                                                    Pô mblang: H’Nêč Êñuôl