VOV4.Êđê - Ƀri wưng bi hdơr 67 thŭn hruê nai êa mdrao Việt Nam, Aguah mbruê 27/2, Khua lăn čar Nguyễn Xuân Phúc mâo leh klei bi tuôm hŏng êpul bi ala phung knuă druh bruă mdrao mgŭn êdah kdlưn kluôm ala. Bi ala kơ Đảng, knŭk kna, Khua lăn čar Nguyễn Xuân Phúc mơĭt truh kơ 150 čô phung bi ala mâo bruă ngă êdah kdlưn hlăm bruă răng mgang leh anăn kriê dlăng klei suaih pral mnuih ƀuôn sang mbĭt anăn mâo dŭm klei êmuh čuă leh anăn klei hơêč hmưi jăk siam hĭn kơ jih jang phung knuă druh, phung mă bruă knŭk kna leh anăn phung mă bruă hlăm bruă mdrao mgŭn.

Khua lăn čar yap yuôm bhăn bruă mdrao mgŭn hlăm 67 thŭn êgao mâo lu bruă ngă êdah êdi, jing sa hlăm dŭm ala čar mâo bruă mdrao mgŭn truh kơ grăp alŭ ƀuôn, rơ̆ng mkăp brei ênŭm bruă mdrao mgŭn kơ mnuih ƀuôn sang. Khua lăn čar mtă kơ phung ngă bruă mdrao mgŭn amâo mdei ôh klei ksiêm hriăm, tui hriăm klei thâo ngă bruă čiăng mâo ênŭm hnơ̆ng čoh čuăn mdrao mgŭn kơ mnuih ƀuôn sang.

Y-Bel pô mblang