VOV4.Êđê- Hruê mbruê 28/9, Khua lăn čar Nguyễn Xuân Phúc bi tuôm leh hŏng Mtao Japon Naruhito ƀri wưng nao čang ênuh Khua knŭk kna hđăp Japon Abe Shinzo, jing sa čô mah jiăng hŏng ala čar leh anăn mnuih ƀuôn sang Việt Nam ti Tokyo. Hlăm mmông bi tuôm, Khua lăn čar Nguyễn Xuân Phúc bi êdah klei ênguôt kyua klei djiê mơ̆ng Khua knŭk kna hdăp Abe Shinzo, mñă klă klei gĭr mtrŭt mđĭ klei bi mguôp Việt Nam – Japon ƀrư̆ hruê ƀrư̆ đĭ kyar, êdah êdi jing mđĭ hnơ̆ng klei bi mguôp hdră êlan kyua klei êđăp ênang, mdrŏng sah ti Asi thŭn 2014, jing ngăn dưn yuôm bhăn mâo 2 ala čar kriê pioh leh anăn bi lar.

Mtao japon lač bruă mđĭ hĭn klei đăo knang leh anăn bi thâo săng hdơ̆ng pô plah wah mnuih ƀuôn sang 2 ala čar hŏng bruă mjĕ êrô dhar kreh, mnuih ƀuôn sang, boh nik hlăm wưng bi hdơr 50 thŭn hruê 2 ala čar mkŏ mjing klei mjĕ giăm, mâo boh tŭ yuôm bhăn hlăm klei đĭ kyar klei mjĕ giăm 2 ala čar.

Pô mblang: Y-Ƀel Êban