VOV4.Êđê - Tlam mbruê, 23/3 ti sang bruă Khua lăn čar, Khua lăn čar Nguyễn Xuân Phúc mâo leh klei blŭ hrăm hŏng Khua mil čhil mrâo djŏ ruah Dhŭng Korea Yoon Suk-yeol. Bi ala kơ knŭk kna leh anăn mnuih ƀuôn sang Việt Nam, Khua lăn čar Nguyễn Xuân Phúc mâo leh klei hơêč hmưi truh kơ Yoon Suk-yeol dưi djŏ ruah jing Khua mil čhil tal 20 ti ala čar Dhŭng Korea, mbĭt anăn hlŏng mơĭt klei êmuh čuă mơ̆ng Khua gĭt gai Đảng Nguyễn Phú Trọng leh anăn phung khua gĭt gai Việt Nam truh kơ Khua mil čhil Yoon Suk-yeol.

Khua mil čhil Yoon Suk-yeol mñă klă, dlăng yuôm bhăn nanao klei mjĕ giăm hŏng Việt Nam leh anăn hmăng hmưi 2 tĭng lŏ mtrŭt mđĭ hĭn hlăm hruê mmông kơ anăp. Khua gĭt gai 2 ala čar bi tŭ ư hlăm hruê mmông kơ anăp srăng lŏ rơ̆ng bruă bi trông êpul, klei bi tuôm gưl dlông, dŭm gưl hŏng lu hdră djŏ guôp hlăm wưng mrâo, sa ai hŏng bruă mđĭ hĭn klei bi mguôp klei êđăp ênang, bruă lĭng kahan leh anăn bruă tuh tia. Bi mguôp kjăp hĭn čiăng tui ngă dŭm bruă bi wưng bi hdơr 30 thŭn mkŏ mjing klei mjĕ giăm Việt Nam – Dhŭng Korea (1992 – 2022).

Y-Ƀel pô mblang