VOV4.Êđê - Ƀri bi hdơr 92 thŭn hruê mkŏ mjing Đảng lehanăn mprăp drông Têt djuê ân Nhâm Dần 2022, hluê si klei bhiăn djuê ana, Khua lăn čar Nguyễn Xuân Phúc nao čuh leh brui mngưi bi hdơr kơ phung khua kiă kriê Đảng lehanăn Knŭk kna djiê leh. Tlam hruê 25/1, Khua lăn čar Nguyễn Xuân Phúc nao čuh leh brui mngưi bi hdơr kơ Nguyễn Đức Cảnh djŏ hlăm wưng mprăp bi hdơr 114 thŭn Hruê kkiêng (1908-2022) ti Sang bi hdơr kơ Nguyễn Đức Cảnh, ƀuôn prŏng Hải Phòng.

Ăt hlăm gưl anei, Khua lăn čar Nguyễn Xuân Phúc nao čuh leh brui mngưi bi hdơr kơ Đại tướng Võ Nguyên Giáp – Pô lĭng kahan kgŭ krŭ kdơ̆ng jhŏng ktang, hđeh hriăm hră êdah êdi lehanăn jĕ giăm mŏng Khua gĭt gai Hồ Chí Minh; Knơ̆ng gĭt gai lehanăn jing Đại tướng tal êlâo hĭn mŏng Lĭng kahan yang ƀuôn Việt Nam. Khua lăn čar Nguyễn Xuân Phúc nao čuh leh brui mngưi bi hdơr kơ Đại tướng Trần Đại Quang, Khua lăn čar, Khua êpul hgŭm bruă lĭng kahan lehanăn răng mgang klei êđăp ênang, Khua anôk bruă gĭt gai hdră mkra mlih bruă kriê dlăng hdră bhiăn gưl dlông mŏng thŭn 2016 truh kơ thŭn 2018./.

H’Nêč pô mblang