VOV4.Êđê- Tlam mbrue (13/5), ti anôk bruă khua lăn čar, Khua lăn čar Nguyễn Xuân Phúc drông čhưn leh hŏng khua phŭn bruă lĭng kahan Indonesia Prabowo Subianto. Khua lăn čar bi myuôm boh tŭ dưn klei bi trông bruă lĭng kahan dua ala čar, lehanăn mơak ƀuh klei bi mguôp bruă lĭng kahan dua ala čar lŏ dơ̆ng mâo klei đĭ kyar.

Dua nah mâo dŭm hdră hyuă kjăp hĭn, bi mkŏ mjing kjăp klei bi đăo knang bruă kđi car, hlue ngă djăp ênŭm, tŭ jing jih jang bruă leh kuôl kă, mđĭ hĭng klei bi hgŭm êpul kahan prŏng, lehanăn bi mjĕ êrô lehanăn mghaih msir bi pral ya mta bruă amâo mâo jăk hlăm êa ksĭ plah wah dua ala čar. Khua lăn čar mñă, Việt Nam dlăng yuôm klei bi mguôp hŏng Indonesia, jing ala čar hgŭm yuôm bhăn tal êlâo ti alŭ wăl, lehanăn mâo nanao klei mtrŭt mđĭ bruă hgŭm hŏng Indonesia mâo klei đĭ kyar jăk, kluôm ênŭm hlăm dŭm mta bruă mơ̆ng duh mkra mnia mblei, bruă lĭng kahan, bruă dhar kreh, bruă sang hră mơar, bruă hiu čhưn ênguê, lehanăn mjĕ mgiăm phung ƀuôn sang./.

Pô mblang: Y-Khem Niê