VOV4.Êđê - Ăt hlăm tlam hruê 21/3/2022, ti Anôk bruă Khua lăn čar, Khua lăn čar Nguyễn Xuân Phúc drông leh Khua Knŭk kna Malaysia Dato’ Sri Ismail Sabri bin Yaacob ƀri gưl nao čhưn klă sĭt ti Việt Nam. Khua lăn čar Nguyễn Xuân Phúc bi mbi kơ gưl nao čhưn yuôm bhăn mjing boh dkrŭt mrâo mđĭ kyar klei bi hgŭm yuôm bhăn plah wah dua ala čar. Khua lăn čar bi êdah klei bi mni kơ sa lăn čar Malaysia jăk siam leh anăn mrâo mrang, hơêč hmưi Malaysia dưi krơ̆ng hnơ̆ng đĭ kyar GDP thŭn 2021 mâo 3,1% leh anăn mđing truh kơ bruă pŏk ƀăng drông tuê hiu hưn ala tač êngao mơ̆ng 01/4/2022; đaŏ knang Knŭk kna Malaysia srăng ngă tŭ jing Hdră kčah 5 thŭn tal 12, ba Malaysia jing ala čar mâo prăk hrui wĭt lu hlăm thŭn 2025 leh anăn mâo bruă klam, kơhưm dlông rŏng lăn ƀrư̆ đĭ. Khua lăn čar Nguyễn Xuân Phúc mtă kơ dua ala čar dưi ba yua klei găl mơ̆ng dŭm klei kuôl kă mnia blei êngiê dua tĭng hdơ̆ng hgŭm mbĭt, mđĭ ktang klei bi hgŭm mkŏ mjing jar bruă duh mkra hlăm jar Êpul êya bruă duh mkra ASEN kñăm hrăm mbĭt kơrŭ wĭt leh anăn mđĭ kyar./.

H’Zawut pô mblang