VOV4.Êđê- Ti Anôk bruă Khua lăn čar, Khua lăn čar Nguyễn Xuân Phúc drông leh Bounthong Chitmany, Khua hlăm Phŭn bruă kđi čar, Khua Anôk dlăng bruă Đảng yang ƀuôn krŭ kdơ̆ng Lao, K’iăng Khua lăn čar Lao leh anăn êpul bi ala gưl dlông Đảng, Knŭk kna Lao dôk čhưn klă sĭt ti Việt Nam. Khua lăn čar Nguyễn Xuân Phúc bi mklă Đảng, Knŭk kna leh anăn mnuih ƀuôn sang Việt Nam jih ai tiê dlăng myuôm, gĭr răng kriê leh anăn amâo mdei ksŭl mbŭ, mđĭ kyar klei bi hgŭm yuôm bhăn leh anăn kluôm dhuôm Việt Nam-Lào.

Dua khua gĭt gai mñă klă klei yuôm bhăn mơ̆ng “Thŭn bi hgŭm Việt Nam-Lào, Lào-Việt Nam 2022” hŏng bruă hâo hưn mtô mblang, bi hriăm dŭm gưl mnuih ƀuôn sang, boh nik ênuk mda asei dua ala čar, kơ knhuah gru bi hgŭm yuôm bhăn anăn, siă suôr amâo dưi bi ktlah plah wah Việt Nam hŏng Lao. Dua tĭng bi tŭ ư lŏ dơ̆ng mđĭ hĭn klei bi hgŭm tŭ dưn bruă sang hră mtô bi hriăm, mdrao mgŭn, mjĕ êrô mnuih ƀuôn sang leh anăn bi hgŭm plah wah dŭm alŭ wăl, lŏ dơ̆ng bi hgŭm tliêr kjăp, hdơ̆ng bi nao ai hlăm klei bi kƀĭn lu ala čar./.

Pô mblang: H’Zawut Ƀuôn Yă