VOV4.Êđê - Tlam hruê 8/6, ti Adŭ bruă Khua lăn čar, Khua lăn čar Nguyễn Xuân Phúc drông leh Khua phŭn bruă lĭng kahan Rajnath Singh dôk hriê čhưn ti Việt Nam. Ti knăm anei, Khua lăn čar Nguyễn Xuân Phúc m’ak hlăk ƀuh klei bi mjĕ bruă lĭng kahan dua ala čar dôk đĭ kyar jăk siam, ba wĭt klei tŭ dưn, đru mguôp yuôm bhăn hlăm klei bi mjĕ dua ala čar. Sa ai hŏng klei blŭ mơ̆ng Khua phŭn bruă Rajnath Singh hưn, Khua lăn čar Nguyễn Xuân Phúc lač klă, klei bi hgŭm bruă lĭng kahan dưi dlăng jing sa hdră bi hgŭm phŭn mơ̆ng Việt Nam – India.

Hlăk boh klei tar rŏng lăn, krĭng wăl dôk mâo dleh dưi ksiêm dlăng ară anei, Khua lăn čar bi mni bruă Phŭn bruă lĭng kahan dua ala čar lŏ dơ̆ng bi kjăp klei đăo knang hlăm bruă kđi čar, pŏk ngă djăp ênŭm, tŭ dưn dŭm hră m’ar hgŭm bruă mâo bi mklă, bi mni kơ Khua phŭn bruă lĭng kahan dua ala čar dưi bi mklă leh Klei hưn mthâo kơ Hnơ̆ng trah dlăng mbĭt hlăm klei bi mjĕ bruă lĭng kahan plah wah Việt Nam – India truh ti thŭn 2030./.

H’ Nêč pô mblang