VOV4.Êđê- Aguah mbrue (23/2), ti anôk bruă khua lăn čar, Khua lăn čar Nguyễn Xuân Phúc drông leh pô bi ala kơ khua mil čhil Mi kơ klei bi mlih yan adiê John Kerry. Bi myuôm kơ klei John Kerry gĭr mkŏ mjing klei hgŭm dua ala čar wưng leh êgao, hlăm anăn mâo bruă mdrơ̆ng hŏng klei bi mlih yan adiê, Khua lăn čar akâo kơ Kerry mtrŭt knŭk kna Mi đru Việt Nam hlăm bruă yuôm bhăn anei. Khua lăn čar bi mni kơ dŭm klei phung khua prŏng Mi hriê čhưn kơ Việt Nam, msĕ si klei k’iăng khua mil čhil Kamala Harris, kñăm hyuă kjăp hĭn klei hgŭm dua nah. Lač jăk kơ Khua lăn čar, pô bi ala John Kerry lač, hŏng klei đĭ kyar jăk siam anei, klei bi mguôp dua ala čar srăng mtrŭn agha êlam hĭn, tŭ dưn hĭn. Bi trông kơ klei êa ksĭ hlăk hlê đĭ nanao, lehanăn anăp srăng hmăi amâo mâo jăk kơ alŭ wăl Dap Mnai Krông Cửu Long lehanăn dŭm krĭng tlung ti Việt Nam, John Kerry brei thâo, Mi srăng đru Việt Nam kơ bruă mdrơ̆ng hŏng klei bi mlih yan adiê, kơ bruă bi êran pui kmlă doh, boh nik jing pil yang hrue. Êngao anăn, Mi lŏ đru Việt Nam kơ klei bi mlih mrô, pioh kơ bruă mđĭ kyar klei duh mkra ala ƀuôn./.

Pô mblang: Y-Khem Niê