VOV4.Êđê - Tlam mbrue (9/3), ti anôk bruă khua lăn čar, Khua lăn čar Nguyễn Xuân Phúc drông leh phung khua bi ala kơ knŭk kna dŭm ala čar: Sierra Leone; Nepal; Guatemala; Maldives; Dominicana ba mdah hưn hriê mă bruă. Drông khua bi ala knŭk kna Sierra Leone, Khua lăn čar lač, Việt Nam dlăng yuôm lehanăn čang hmăng mtrŭt mđĭ klei hgŭm hŏng Sierria Leone hlăm djăp mta bruă: Kđi čar, bruă hŏng tač êngao; bruă lŏ hma; bruă kreh knhâo, bruă duh mkra mnia mblei. Mbĭt hŏng anăn mđĭ hĭn klei bi hgŭm dua ala čar hlăm dŭm mta bruă lu tĭng, bruă hlăm alŭ wăl lehanăn dlông rŏng lăn; boh nik jing prăp êmiêt kơ bruă bi tuôm gưl dlông plah wah dua nah. Drông khua bi ala knŭk kna Nepal, Khua lăn čar mñă, Việt Nam dlăng yuôm kle ibi mguôp hŏng Nepal. Khua lăn čar đăo knang srăng lŏ dơ̆ng ngă jih ai tiê pô đru mguôp hlăm dŭm bruă yuôm bhăn klei hgŭm dua ala čar. Drông khua bi ala kơ knŭk kna Guatemala, Khua lăn čar lač, dŭm phŭn dhar bruă mơ̆ng Việt Nam srăng mjing djăp klei găl čiăng kơ Anôk bruă bi ala kơ knŭk kna bi leh jăk bruă kñăm klei hgŭm dua nah./.

Y-Khem pô mblang