VOV4.Êđê - Tlam hruê 13/4, ti anôk bruă Khua lăn čar, Khua lăn čar Nguyễn Xuân Phúc drông leh pô bi ala Êjip, aduôn Amal Abdel Kader Elmorsi Salama ba mdah hră m’ĭt ala čar. Ti knăm drông, Khua lăn čar mñă klă Việt Nam dlăng myuôm klei bi mjĕ jăk siam mơ̆ng đưm hŏng Êjip lehanăn dlăng Êjip jing sa ƀĭng hgŭm mrô sa mơ̆ng Việt Nam ti krĭng Afrĭk. Việt Nam bi mni bruă klam lehanăn k’hưm yuôm bhăn mơ̆ng Êjip ti krĭng Afrĭk lehanăn tar rŏng lăn. Brei thâo, mnuih ƀuôn sang Êjip bi mni kơ knhuah dhar kreh ăt msĕ mơh hƀuê ênuk mơ̆ng Việt Nam, Pô bi ala Êjip čang hmăng dua tĭng srăng mâo dŭm hdră msir mtrŭt mđĭ hĭn bruă anei, boh nik hlăk Êjip ăt mâo knhuah dhar kreh čiăng msĕ hŏng Việt Nam./.

H’Nêč pô mblang