VOV4.Êđê - Tlam hruê 22/3, ti anôk bruă Khua lăn čar, Khua lăn čar Nguyễn Xuân Phúc, Khua anôk bruă gĭt gai Hdră êlan mkŏ mkra lehanăn bi leh knŭk kna yang ƀuôn ngă phŭn Việt Nam djŏ hdră bhiăn truh ti thŭn 2030, tă hdră êlan truh ti thŭn 2045, mâo leh klei bi tuôm hŏng phung thơ̆ng kơ bruă, phung mă bruă kreh knhâp, mnuih hgŭm hlăm Êpul hluê ngă hdră bruă yuôm bhăn anei. Knăm bi tuôm dưi mkŏ mjing jăk siam hŏng 3 klei bi kƀĭn trông gưl ala čar ti 3 kwar Dưr – Krah – Dhŭng mâo Anôk bruă mkŏ mjing, mâo leh dŭm êtuh klei čih, klei blŭ đru mguôp mơ̆ng phung thơ̆ng kơ bruă, phung mă bruă ksiêm hriăm, phung mă bruă kriê dlăng, phung mă bruă kreh knhâo mrô sa mơ̆ng ala čar kơ dŭm bruă djŏ tuôm kơ Hdră êlan mkŏ mkra lehanăn bi leh knŭk kna yang ƀuôn ngă phŭn Việt Nam djŏ hdră bhiăn. Blŭ hrăm ti knăm anei, bi ala phung khua kiă kriê anôk bruă, Khua lăn čar Nguyễn Xuân Phúc bi mni kơ boh tŭ hdră mă bruă truh kơ wưng ară anei, mbĭt anăn bi mklă klei gĭr ktưn hluê ngă tŭ dưn dŭm bruă mâo kčah mtrŭn./.

H’Nêč pô mblang