VOV4.Êđê- Aguah mbruê 6/6, ti bo Hạ Long, čar Quảng Ninh, Khua lăn čar Nguyễn Xuân Phúc, khua gĭt gai gai hdră mkăp gĭt gai klei kƀĭn đru mguôp boh blŭ mơ̆ng dŭm bruă Đảng čar, bruă Đảng ƀuôn prŏng hlăm gưl dlông (alŭ wăl krĭng Dưr) hŏng hdră êlan mkŏ mjing leh anăn bi kluôm ênŭm ala čar yang ƀuôn ngă phŭn Việt Nam truh ti thŭn 2030, hdră tă truh thŭn 2045.

Hlăm klei kƀĭn, dŭm čar, ƀuôn prŏng alŭ wăl krĭng Dưr bi tŭ ư hŏng dŭm bruă klưn hĭn dưi ba mdah hlăm hdră mkăp, hlăm anăn mâo klei mđĭ hĭn bruă mbha gưl, mbha klei dưi, mbĭt anăn čiăng bi klă hĭn hlăm hdră mkăp kơ klei mjĕ giăm plah wah knŭk kna hŏng bruă sang čư êa alŭ wăl leh anăn hdră êlan klă klơ̆ng mđĭ klei mbha gưl, mbha klei dưi, bi myuôm klei čŏng pô, klei čŏng đua klam. Blŭ hlăm klei kƀĭn, Khua lăn čar Nguyễn Xuân Phúc yap yuôm bhăn dŭm čar, ƀuôn prŏng alŭ wăl krĭng Dưr mâo leh lu klei blŭ yuôm bhăn leh anăn bi tŭ ư kơ hdră mkăp, mbĭt anăn lŏ mtă kơ dŭm čar, ƀuôn prŏng lŏ dơ̆ng ksiêm duah hdră mkăp čiăng bi mguôp lu boh blŭ hĭn.

Pô mblang: Y-Ƀel Êban